《花木蘭》有錢賺 迪士尼唔敢搏《黑寡婦》延期上畫

Marvel超級英雄人物系列嘅《黑寡婦》又褪期？似乎出品嘅迪士尼對疫情好無信心，旗下電影上映日期改完又改！《花木蘭》片期改完再改之後，最後北美地區決定放棄傳統上映模式，唔上戲院直上自家串流平台Disney+，俾30蚊美金就有得睇。

新模式本來不被睇好，點知成績驕人，《花》單喺北美地區就為迪士尼帶來2億6000萬美元收入，又唔駛同戲院拆賬，居然賺得仲勁過《天能》。

迪士尼喺電影業務上照計無蝕錢仲有賺，直上自家串流平台呢種新發行模式亦work，不過迪士尼似乎仍想行傳統上映模式，剛剛發布最新電影片期，寧願再次褪一眾片期，都唔願意將套戲直上Disney+。

原本旗下嘅《黑寡婦》將會由今年11月改到下年5月，其他Marvel電影一齊改期，例如有梁朝偉做滿大人嘅《上氣》就由下年5月改到7月，而Angelina Jolie主演嘅《永恆族》就由下年2月改到年尾先上映！

一改再改嘅片期，意味住成個2020年都唔會睇到Marvel電影！好彩年尾仲有其他迪士尼電影撐場，大人細路都啱睇Pixar出品嘅《靈魂奇遇記》就無改期，美國繼續上11月20日（香港映期：11月19日），而近年《死侍》轉型成功嘅Ryan Reynolds，12月就以另一套限制級笑片《爆機自由仁》（香港映期：12月22日）同大家過冬。

為咗不失聖誕檔期，迪士尼將《神奇女俠》Gal Gadot、《以你的名字呼喚我》Armie Hammer及《性愛自修室》Emma Mackey主演嘅犯罪懸疑片《尼羅河謀殺案》由10月褪到12月18日作為佳節獻禮，香港映期暫時未知會唔會同美國一齊褪。

隨住全球各地抗疫效果不一，北美歐洲等地剛開始爆發第2波疫情，導致票房成績亦相當參差，「全球同步開畫」一定行唔通，所以以上片期只能作為參考，因為好有可能香港上到畫，反而美國上唔到。