「娥頸橋之戀」再被逼供　岳少講起玉娥姐話受寵若驚

立法會選舉雖然已經完咗，不過因為一張相而曝光嘅「娥頸橋之戀」引起網民熱論，雖然本報上載當時嘅片段、揭示咗「真相」，但網民仍然樂此不疲咁改圖，仲整埋MV。當事人楊岳橋今日出席商台節目，都畀主持人問到呢件事，「岳少」一提起「娥姐」就笑晒，仲話好「受寵若驚」。

相關報道：網上瘋傳楊岳橋同娥姐親密照　網民稱心都碎埋　短片揭真相

岳少一坐低就畀主持人問，近日喺facebook瘋傳嘅「娥頸橋之戀」係咩事，岳少笑笑口咁話「受寵若驚」，又解釋番當日嘅事發經過，話星期一宣布咗當選名單之後，各候選人都有上台影相，「咁啱小弟同玉娥姐同時間喺台上面，咁啱有啲互動，畀唔知咩人影低咗，咁就變成幾有趣嘅圖畫啫」。對於佢哋喺台上行嚟行去，岳少就解釋話，「我以為佢（陳玉娥）要行去台嘅另一邊，咪讓個位畀佢，咁啱喺行過嘅途中，（主持人陳志雲形容為黃金交差點）大家握個手，普通寒暄一兩句」。

不過主持人無諗住咁快放過岳少，陳志雲話，岳少高過玉娥，望落去就好似一對戀人，楊岳橋向下輕吻，岳少又係笑笑口咁話，「大家聽得881，應該唔想聽啲903嘅嘢」，呢個話題就停咗。睇番商台擺出嚟嘅訪問片段，都睇到岳少成個訪問過程都保持笑容。