「華納一哥」冇留意MIRROR啲歌 林峯硬撼Ian：唔認識佢！
林峯再戰樂壇，做自己想做的音樂。
「華納一哥」林峯再戰樂壇，對於跟人氣男團MIRROR成員Ian同日出歌正面對撼，他表示工作太忙，未認識後起之秀，現時推出新歌的心態是希望受認同，故會努力宣傳，不過忙公事之餘亦趕造人，因有高人指點虎B大旺兩夫婦。
林峯簽約唱片公司快兩年，昨日首次以「華納一哥」身份宣傳新歌，對於新尊號他謙虛說：「係華納一分子，都係一字啫！榮幸加入呢個大家庭。」談及其《幼稚未完》跟Ian新歌《留一天與你喘息》同日面世，被指兩代男神正面交鋒，他說：「多謝呀！過去兩年都係主力拍戲，唔認識佢，亦冇留意MIRROR啲歌，但希望有機會同對音樂有熱誠嘅歌手合作。其實係開心嘅，因為之前樂壇比較靜，依家有番生氣，百花齊放。」
有傳他忙拍戲而無暇宣傳之前的《唱情歌的人》，林峯表示今次會加倍努力：「所有電台、ViuTV都會做，無綫就安排緊。（想打入流行榜、高點擊？）我冇乜大志向㗎！想做自己想做嘅音樂，但梗係愈多人認同愈好，因為我同唱片公司、團體好用心去做，唔係我一個人。」
趕生虎B
林峯又透露會留港拍戲至年中，不過太太及囡囡已來港，令他安心。問可有空造人？他說：「我都想，希望下半年啦！聽講虎B好旺我哋兩個，目標生3個。（恨仔？）女仔就冧啲，我就算幾攰返到屋企，見到個女都好開心。」
此外，林峯罕有在社交網Post與老婆帶住囡囡在郊外欣賞日落的靚相，還充當攝影師，雖然只簡單留下一個心心，但已令網民感受到他對妻女滿滿的愛。而張馨月亦Post了多張一家3口共享天倫的靚相，留言：「生活碎片，幸福生活！」相中見兩公婆拖住囡囡在海邊散步，林峯更化身湊女公，盡顯慈父一面。
