【初戀啊】簡淑兒客串《愛·回家》單元 巴打戀愛了

大台處境劇《愛‧回家之八時入席》雖然有好戲之人，但收視跑唔出成績。劇組都絞盡腦汁去救收視，之前已經搵咗唔少女藝人客串，好似「宅男女神」陳瀅、大台「咪神」張秀文同劉溫馨。最近仲加入「少女標本」成員簡淑兒（Jessica）擔正做單元女主角，Jessica呢個清純新面孔即時引起唔少巴打注意，有巴打話搵返初戀咁。認真誇張。

Jessica之前已經喺《3日2夜》擔任主持，都有客串過幾套劇集。今次喺劇中就做單元女主角，睇嚟被力捧都係遲早嘅事喎。

講返劇情，今次Jessica係飾演會計部職員嘅Elsa，同阿齊（阮政峰飾）及十仔（馬貫東飾）有段暗戀嘅三角關係。原本Elsa因為暗戀綜藝部嘅十仔，所以就去應徵古曉臣（黎耀祥飾）行政秘書。不過阿齊就以為Elsa暗戀自己，仲想盡辦法幫Elsa應徵。當Elsa咗包曲奇畀佢，佢仲以為係有特別意思，不過Elsa送畀十仔嗰包先係心心曲奇。

唔知劇情係唔係太有共鳴，唔少巴打都話阿齊好慘，又話十仔有個靚女鐘意好幸福。真係睇得好投入啊！

劇集出街之後，好多巴打都對Jessica好有興趣，大讚佢又True 又Pure，又話佢好生得好可愛，好有初戀嗰種傻更更嘅感覺，總之就人肉起底，好多FF啦。