【改口風！】否認片酬1.5億美元　丹尼爾：十分想念占士邦

英國男星丹尼爾基格（Daniel Craig）拍完第24部占士邦電影《007：鬼影帝國》後，導演森文達斯（ Sam Mendes）話唔再執導，而丹尼爾亦打算退落嚟，唔再做007。雖然占士邦電影系列監製之一嘅Callum McDougall，開到聲話丹尼爾係下部007電影嘅首選，不過丹尼爾依然唔肯應承再拍。

不過最近丹尼爾出席「The New Yorker Festival」時，問到佢會唔會繼續做007，佢似乎有啲唔捨得：「我只能話我會十分想念呢個角色，因為演007係成為一個演員最興奮嘅事。」問到點解佢之前話，寧願斬手都唔想再拍，佢話當時咁講，只係因為自己太辛苦：「拍完鬼影帝國後，體力已經用盡，所以先講呢啲說話。」

講咁多，唔通丹尼爾想繼續拍落去？咁話晒早前有報道指，電影公司願意出價1.5億美元，希望丹尼爾拍多兩部007先走，雖然佢就否認，不過「有錢使得鬼推磨」，唔少外國傳媒聽完佢咁講，都覺得佢係暗示自己嚟緊會繼續做占士邦！