【疑被Out】《慶餘年》班底合體獨欠肖戰
唔係嘛，靚仔都冇得留低？
內地古裝劇《慶餘年》依家晚晚播，迷到一班師奶粉絲嘩鬼叫，一早網上煲晒全劇嘅網友都知，去到最後大直路，「范閑」張若昀將被「言冰雲」肖戰一劍刺中倒地，並為第二季埋下伏筆。
張若昀依家升呢去到一線，都係多得「范閑」唔少。
張若昀同李沁嘅感情戲真係羨煞旁人～
因應疫情，續集將會在今年年底左右先正式開拍，而第二季劇本大綱出爐，當中好多細節都要調整，不過聽日（6日）張若昀就會帶領劇中四大美女李沁、宋軼、辛芷蕾、李純加埋「范思轍」郭麒麟，錄製大陸節目《王牌對王牌》，未開拍先合體，為續集造定勢。
「司理理」李純
辛芷蕾做北齊聖女「海棠朵朵」，都係後期先出場。
阿妹「范若若」宋軼
連「范思轍」郭麒麟都有份上節目，即係續集都有佢份啦！
除劇本問題，大家最關心都係原班底能否順利演出，畢竟一直有傳成員無法齊聚，而今次出席節目嘅來賓，基本上都確認會出演第二季，不過大家睇睇吓又覺得唔對路，因為主要演員兼人氣流量嘅肖戰竟然唔見影，雖然肖戰飾演嘅言冰雲去到後期先出現，但絲毫冇耽誤佢嘅人氣，更有好多人係因為肖戰已煲晒成套《慶餘年》添，搞到有網友就擔心唔知續集係咪會飛走肖戰，驚冇得再見到偶像出鏡！
「言冰雲」肖戰去到尾會成為伏線主角之一。
不過今次節目就冇預肖戰（右），搞到粉絲心碎…