全球「最談不起戀愛」成本調查 城市 香港上榜

香港生活成本高昂，再次得到印證。話說一項以交通、set dinner/lunch、飲品、電影飛同埋直落飲少少啤酒嘅全球拍拖成本調查，香港上到榜﹗

個榜係將一次廉價約會所需嘅實質金額，相加作比較，47個城市當中，香港排行第20，同三潘市、東京、蘇黎世呢啲地方比較，都係算平（但要留意調查並無先還原價格為「購買力」）。

根據調查，喺香港一次約會，需要花約111美元，即約865蚊港元，2017年，比2016年增加9.6%，以增幅計反而不輸給其他已發展地區。

之不過，如果根據之前坊間啲情場老手個案去睇盤數，個調查其實有少少低估港男港女嘅拍拖成本；計計數兩個人總共4餐、兩張包爆谷汽水嘅戲飛，加埋支花，夜晚仲要落酒吧，假設飲完酒無無晒下文，都至少1000蚊以上，打入全球10大，絕對唔係無可能嘅事。

但其實香港人，仲可唔可以低成本拍拖？

到咗老麥都出貴價包要走高檔路線嘅時候，似乎唔會再有「肯捱麥記的女人」呢支歌仔唱了，你會發現，無一百蚊都唔好入老麥拍拖。