吳若希自爆分手 網民寸「閃得越勁散得越快」

吳若希今年7月先被爆同遊泰國，事後佢同澳門闊少Alex大方承認戀情，又不時喺網上晒愛，有指Alex喺澳門做代理洋酒生意，同時亦辦網上團購，兼入股某品牌眼鏡，涉足多種不同生意，家底唔錯。

據知早於今年3月，Jinny被爆得到有錢長輩「十哥」林棣權嘅照顧後，佢已經火速搭上Alex，二人更瞬即打得火熱，拍拖半年，可惜都係要分手…吳若希今早喺微博、facebook及Ig自爆已同Alex分手，貼出愛犬Honey嘅相，揚言分開都要高調，不過佢就冇刪走同前度Alex嘅舊相，有唔少fans支持佢，留言：「Honey，這時候要好好疼主人」、「好可惜啊！唔緊要㗎！仲有大把機會，你仲年輕，唔好咁易放棄呀」、「加油加油！我支持你！雖然我唔知道你哋咩事要分手，但係希望你唔好諗埋一邊，開心啲」、「瞓醒又是一條好漢」。亦有網民問「係咪因為見到素顏」、「轉地下情」，亦有網民寫道；「閃得越勁散得越快從來都係至理名言。」