姚子羚自揭臨門撻Q唔願嫁

女星姚子羚屢次分手都被指是「逼婚不遂」，她直言清者自清，不愛多作解釋。她又自爆曾「逃婚」，但仍想相信愛情，深信花花公子都有定下來的一日。

踏入40歲的姚子羚入行18年，情史不多，較為人所知的是拍拖3年，但最終於2018年分手的鄭子邦，至2年前與夜場老闆Raymond撻着，卻又不幸背上「小三」之名，其實她才是受害者，不過有指她已原諒對方並「翻撻」。每當問及此事，她都不願多談，至於現時的感情狀況，她只說：「我對感情係一個好認真嘅人，無論追求者、前度又或是另一半，我都唔想身邊人有壓力。佢哋係圈外人，有時畀人起底，啲資料都係錯嘅，我性格又唔鍾意解釋，只會間接傷害到更多人，我只想保護大家。」

尋顧家男付託終身

屢次被指「逼婚」致戀情觸礁，子羚坦言只希望找到一個真正可以付託終身的人，並自爆多年前曾「逃婚」：「啲人成日話我『逼婚』，係與唔係，清者自清。對我嚟講，感情係幾私隱，再解釋都冇用，兩個人喺埋一齊冇得逼，就算你今日逼到對方結婚，唔啱嘅都會離婚！嗰陣我同男朋友提及過結婚，大家仲去埋睇樓添，最終冇結係因為大家價值觀唔同，嗰刻覺得佢未係我人生可行埋落去嗰個，唔Work咪唔繼續囉！」情路上屢受打擊，但她仍相信愛情，明言不會卻步：「好多嘢係Timing問題，就算一個花花公子、浪子，都有想定下來嘅一日，睇吓你遇唔遇到啫。我覺得男人點都要顧家、有責任心，呢樣嘢唔係純粹感覺就得，我都尋找緊兩者兼備嘅人。」

做「中女」Keep住靚

提到在正在播映的劇集《大步走》中飾演「何家欣」，角色是帶點傻氣的中女，她多年來都未演過同類角色，笑言「何家欣」某程度與她相似：「我都係男仔頭、傻大姐，角色將子羚某部分投放出嚟，喜劇對我嚟講係挑戰，唔用力做角色唔豐富，做得多又怕太誇張，不過可以畀大家見到我真正戲外嘅另一面都好。」

女人在踏入30歲與40歲的生理與心理狀態分別甚大，子羚笑言對於「中女」這個稱號仍在「Feel緊」：「自己冇介意，我只能講，就算係中女，我都希望有自己嘅生活態度，Keep得好靚。」問到會否更想早日結婚生仔？她說：「人大咗要用時間了解一個人，冇以前咁大勇氣，好多嘢估計唔到，但我相信愛情嘅感覺。我亦明白人生要面對現實，搵唔搵到一個適合你共度下半生嘅人？呢啲嘢真係急唔嚟。」