楊岳橋同娥姐親密照-短片揭真相

今屆立法會選舉塵埃落定，其中新界東有22張名單爭9個席位，選情極之激烈，最後長毛梁國雄僅僅險勝方國珊而贏得末席。選戰完結後，網民依然回味緊噚日情況，網上瘋傳講過「CY太完美」嘅陳玉娥同當選嘅公民黨楊岳橋（AY）親密合照，惹嚟網民哄動改圖，更形容娥姐「有AY無CY」，亦有網民話「心都碎埋」。不過據Emily了解，有關相片只係角度問題，當時兩人並無咁親密，但雙方表現友善，仲搭膊頭合照添。

其中facebook「810扮工室」貼出相關相片，留言話「【選戰背後】震驚13億人（助選團）的真相！」，表示完成點票後，娥姐笑住走嚟同AY提出合照，而競選團隊竟然影到一張咁嘅相。

相中見到娥姐同AY面對面、幾乎頭貼頭，AY仲微微耷低頭，好親密咁款。Emily向當日在場嘅同事了解，終於搵到當時嘅短片，見到娥姐喺台上同AY握手，然後打算離開時，兩個人剛好一個錯身，變成好似好親密咁啫，錯覺嚟嘅。

娥姐原本已經離開，但後來又返轉頭拎嘢，並再次停低同AY合照，AY更親切地搭住娥姐膊頭，搞到現場人群起哄，最後兩人友善揮手講拜拜，表現友好。

楊岳橋後來喺個人facebook發出「嚴正聲明」，強調佢個頭同娥姐個頭，「絕對沒有物理性或非物理性的接觸」，佢亦絕無「試圖企圖或意圖玷污陳小姐的髮髻」，至於網上湧現大量改圖，佢就表示「笑到有腹肌，並保留一切追PO（貼文）權利」。