炎明熹棄招牌眉上齊蔭變性感火辣 網民讚有女神feel

炎明熹棄招牌眉上齊蔭變性感火辣 網民讚有女神feel：靚過Chantel

炎明熹（Gigi）憑TVB歌唱選秀節目《聲夢傳奇》成功彈起，首支派台作品《真話的清高》成績驕人，榮獲新城電台及叱咤女新人獎項，更與姚焯菲（Chantel）、詹天文（Windy）及鍾柔美（Yumi）組成After Class；早前亦推出第一首個人國語歌《複雜》，歌藝了得之外，最令人印象深刻嘅必定係佢個眉上齊瀏海。不過近日炎明熹一改形象，意外得到網民大讚好睇，甚至話佢靚過有「國民初戀」之稱嘅姚焯菲。

炎明熹喺IG分享新造型照，拾棄標誌齊蔭，將頭髮中間分界同時扎起馬尾，搭配比平日濃嘅妝容，又穿上吊帶小背心將苗條身段呈現，散發陣陣小性感，與平日「火星女生」清純形象大為不同；大批網民留言激讚炎明熹，直言認佢唔到，又指呢個先係王佳恩（炎明熹本名）：「誰家的孩子呀」、「王佳恩系列，咁靚女會比炎明熹發現架」、「呢個係王佳恩！一樣咁cool咁靚！」、「點解你咁有型嘅」、「咁火辣得唔得㗎」、「喜歡不同形象的Gi」、「真女神，仲靚過Chantel」等等。

同樣來自《聲夢傳奇》嘅文凱婷（Aeren）亦有留言大讚炎明熹：「Oh my god…天生明星相」，不過勢估唔到有網民留言取笑文凱婷雙眼距離遠：「點似你左眼去右眼要坐120蚊uber」，令支持文凱婷嘅粉絲留言反擊，惹嚟一場粉絲們罵戰。