陳俊堅自爆同張名雅拍過拖

TVB節目《七線人棄王》由5位真係七線藝員鄭雋熹、林浩文、程浩駿、姚宏遠及陳俊堅主持，自揭奀星辛酸史之餘玩盡各式綜藝環節，上星期六播出精華版之後觀眾反應唔錯，但原來全套10集節目要喺串流平台先有得睇。

其中一個環節係爆料訪談，第6集話題講感情史，陳俊堅自爆曾經係「藍血人」，即係同過港姐拍拖。同場嘅程浩駿立即助攻爆料，陳俊堅舊愛係2012年港姐冠軍張名雅。陳俊堅講起嗰次拍拖經歷就話相處出街好麻煩，因為好多嘢要避忌，例如去旅行坐飛機要分開坐，睇戲都要等套戲開場先入場。有呢次經驗之後，陳俊堅寧願同圈外人拍拖，但強調舊愛係好人。講講下先知，陳俊堅另一位前度，係TVB藝人李君妍。

唔止陳俊堅，另一位「人棄王」林浩文都曾經係「藍血人」，因為佢同過2014年港姐邵佩詩拍拖。不過林浩文講得冇咁juicy，最多都係講起因為合眼緣而同對方一齊，後來因了解而分開，好多尖銳問題都避得就避。