香港與外國的波鞋文化差異

香港與外國的波鞋文化差異

小弟早年因屋企人嘅緣故可以移民外國，直至近年先至回流香港呢個彈丸之地。亦因如此，我亦有幸體驗到外國同本地波鞋友嘅分別，今日就講吓兩方嘅不同之處。

首先，外國嘅波鞋友係好樂意地share任何好野比身邊嘅人。佢哋明白到波鞋界其實係個好細嘅圈子，今日你幫到人，他日你有任何麻煩時（無論關唔關波鞋事） 都會好落意去幫你。上星期黑色YEEZYBOOST出嗰陣，我就聽到澳洲有單CASE係個買家抽中咗，不過去到個收銀處俾錢先發覺帶唔夠錢！有個三唔識七嘅人行埋去同佢講我幫你比，對鞋你照keep，呢幾日內過返錢比我就得㗎啦。兩位因此而做咗朋友，鞋主亦係同一個波鞋group裡面點名讚揚佢嘅行為。 嘩！比著你喺香港，前面或後面嗰個仲唔水你讓個quota比佢！我本人亦受益過呢種所謂嘅「HOOKUP文化」，不過喺香港就少之又少。

另一樣，就係大家都會好樂意地share下自己嘅collection之餘，亦會尊重大家嘅不同之處。所以你會好容易搵到專儲NIKE SB嘅Collector，又或者係買法國製造嘅adidas Superstar嘅收藏家。佢地唔只會影相擺上網仲會攪大型party，同埋其他Collector一齊當嘉年華咁玩！雖然近年香港已經出現類似嘅活 動，不過係外國十幾年前已經有。

其實香港同外國嘅波鞋友最大嘅分別，就係外國波鞋友大多數都係由細到大都鍾意波鞋，同埋任何牌子任何款都會買！佢哋亦會特別對鞋款本身嘅歷史同周邊嘅趣事有興趣，務求清楚佢哋著腳上嘅鞋款起源同設計師係邊個。但近年香港嘅波鞋文化就有少少歪曲咗，無端端多咗好多所謂嘅「波鞋友」出現，講到自己幾鍾意幾鍾意波鞋，但連MICHAEL JORDAN係邊個都唔識，指住對AJ就話係GD對鞋。嘩大佬，我係MJ都比您嚇死，真係唔識就做吓功課先至出嚟獻世啦。

眼見現今香港嘅波鞋文化已經比鄰近嘅國家超越同埋炒賣都日益嚴重，有時會諗係香港做個波鞋友都幾慘。亦因為咁先至會成立Sneaker Haven HK，就係要喺波鞋嘅知識上著手，希望可以培養返啲好嘅SNEAKERHEAD嘅出現。

小弟遲啲會繼續介紹多啲波鞋嘅周邊小知識比大家，未來嘅日子請大家多多指教。