麥美恩摸粗碌物體　爆響口唔屬於許文軒

緋聞情侶麥美恩與許文軒（Edmond）孖住出席《粵講粵㜺鬼》節目宣傳，玩遊戲伸手入箱猜箱內食材時，麥美恩摸到蔗後即口快快說：「咁粗嘅，唔係Edmond嘅。」Edmond立即伸手與美恩一齊摸，摸足半分鐘，現場立即起哄，有人大叫：「唔好借啲意拖手。」同節目的歌手戴祖儀又在兩人後面做心心，事後兩人亦大方派心心，問是否公開戀情？美恩詐傻：「我話佢手臂粗！」Edmond笑言自己大髀粗。

由於男方首次由主播轉做節目，美恩讚他努力，但否認有推薦對方：「佢靠自己，監製揀咗佢後，係有問過我。呢個節目唔係一般主持，仲要識做戲，（有你特別培訓？）有培訓計劃，點搶Fo，佢係男仔辛苦啲，所有飛身、舞醒獅都係佢做，（培訓完得唔得？）去多轉廣州先，之前去過5日，嚟緊去7日。」問到出埠會再增進感情？麥美恩直言好少跟男仔出埠，冇鬧交已很好，因為出埠會見真章，讚Edmond好就得她：「有次好攰同戴祖儀想去揼骨，叫埋Edmond，佢又肯，我唔想揼全身，淨係揼腳，佢都肯就我，（咁好做男友？）再出多次埠先，佢又唔會佔我便宜。」

首次拍節目的許文軒，透露放下主持包袱，會扮女人又會着古裝，並多謝美恩支持，大讚她經驗老練，問會否以身相許？他說：「叫佢教多啲點扮靚女。」