黎彼得通波仔要停工陷財困 黃宗澤劉鑾雄雪中送炭

曾經係八十年代當紅填詞人嘅黎彼得（Peter哥），轉戰幕前做演員多年，近年最為人認識係《愛．回家之開心速遞》入面飾演「大四喜」成員之一嘅豹叔。有觀眾發現黎彼得冇喺劇集出現一段時間，有傳媒搵Peter哥了解，先知道佢因為心血管堵塞要「通波仔」。做完手術之後Peter哥開過工十日，劇組再安排佢休息，點知一等就幾個月，搵高層曾勵珍同劇集監製了解都係冇下文。

手停口停，黎彼得坦言醫藥費加埋30萬仲要冇工開，經濟上好吃力。好在Peter哥契仔黃宗澤得知情況後即刻出手幫忙度過難關。原來Peter哥同黃宗澤早喺2004年拍《我的野蠻奶奶》時認識，當時有待上位嘅Bosco話認Peter哥做契爺，雖然冇正式上契儀式，但係契仔一直好照顧，Peter哥都大讚契仔「人紅係有原因」。

除此之外，黎彼得今日亦向傳媒透露，富商劉鑾雄（大劉）透過秘書接觸佢，表示願意資助手術費同生活開支，劉生仲自稱係Peter哥嘅fans，好鍾意佢當年演《小男人周記》嘅大古惑一角。Peter哥起初以為係電話騙案，因為同大劉唔認識，直到對方問起銀行戶口號碼先知係真，令佢十分開心。

黎彼得多年前同太太離婚後，獨力撫養獨生兒子，但係因為搵食，個仔童年時多數時間由工人照顧。而家佢地父子關係普通，之前Peter哥入院，阿仔身在內地工作冇法趕返香港代交醫院按金，要搵朋友幫手先得。